Frítekst tagging:
- Tíðindi, mentan og ítróttur
Føroyingarnir drønaðu avstað frá fyrsta skoti
Føroyingarnir drønaðu avstað frá fyrsta skoti
Tey flestu runnu seg víðari í innleiðandi kappingunum í renning, sum vóru í sonevnda Picky-leikvøllinum í Kirkwall í dag. Finalurnar vera næstu dagarnar
Julian Gregersen rann seg í finaluna í 1500 metrum, sum verður týsdagin. Hann skal eisini renna 5000 metrar og hálvmaraton
Mynd: Dánial Olsen
13.07.2025 - 17:30
Føroysku rennararnir drønaðu avstað frá fyrsta skoti, tá fleiri innleiðandi rennikappingar vóru á Picky-leikvøllinum í Kirkwall í dag.
Jónas G. Isaksen og Dánjal Dahl Ljósheim runnu seg trygt í hálvfinalurnar í 400 metur renning. Teir runnu í hvør sínum innleiðandi riðli og høvdu fult tamarhald á renningini.
Dánjal Dahl Ljósheim vann sín riðil við tíðini 50.10 sekund, meðan Jónas G. Isaksen endaði nummar tvey í sínum riðli við 50.24 sekund.
Í 400 metrum hjá kvinnum endaði Maria Biskopstø á 2. plássi í sínum riðli við 57.80, og Margit Weihe Fríðmundsdóttir endaði nummar trý við 27.70 í 2. riðli.
Fitt av føroyingum vóru á Picky-leikvøllinum og hugdu at renning og badminton í dag. Hugaligt var at sita í góðveðrinum og síggja føroyingarnar renna seg víðari (Mynd: Dánial Olsen)
Skjótu kvinnurnar í finaluna - Tummas beint uttanfyri
Oddvør Josephsen og Elisabet Holm Simonsen struku eisini í finaluna í 100 metur renning. Oddvør Josephsen endaði á 3. plássi í sínum riðli við tíðini 12.92 sekund, meðan Elisabet Holm Simonsen endaði á 4. plássi við 12.96.
Hjá monnum stóð eitt sindur meir á. Andreas B. Antoft rakk hálvfinaluni við tíðini 11.41 og 4. plássi í riðli trý, meðan Tummas Petur Sjóvará var 0.01 sekund frá við 11.48 og 4. plássi í 5. riðli. Ein troyst var, at hann fekk persónligt met.
Á 1.500 metrum livdi Julian Gregersen upp til styrkismetingina, og rann seg í finaluna við tíðini 3.58.84 minuttum. Hann endaði nummar tvey í sínum riðli, og hóast aðrir hava runnið skjótari enn klaksvíkingurin í ár, hevði hann góðar vónir um at røkka einum heiðursmerki, tí hann er sera væl fyri í løtuni.
Er kopiera
Nýggjastu sendingar í ÚV
Nýggjastu sendingar í SV
