Børn í Fraklandi fáa útgongubann

Franskir býir seta nú útgongubann fyri børn. 

Hetta hendir eftir eina røð av harðskapsmálum, sum hava samband við rúsevnishandil.

Í býnum Nîmes í Suðurfraklandi sleppa børn undir 16 ár ikki út millum kl. 21 á kvøld og seks á morgni.

Borgarstjórin kallar støðuna har "óhaldføra" og sigur, at rúsevnisumhvørvið í býnum hevur stúran og ótryggleika við sær.

Harðskapurin heldur fram

Spurningurin er tó, um tað at banna børnum og ungum at vera úti um kvøldið og náttina fer at broyta nakað. 

Tí í býnum Béziers hevur útgongubann fyri børn verið galdandi síðani í fjør, men kortini heldur harðskapurin fram. 

Eisini býurin Limoges hevur sett líknandi tiltøk í verk í summar, men borgarstjórin har sigur, at bannið hevur havt lítla ávirkan.

Sambært franska innanríkisráðnum doyðu 110 fólk í fjør í harðskapi, sum hevði samband við rúsevni.