Hittast til friðarsamráðingar í Turkalandi í kvøld

Russland og Ukraina hittast í kvøld til friðarsamráðingar í turkiska høvuðsstaðnum, Istanbul.

Hetta vátta báðir partar, sum longu eru á veg til Istanbul.

Sambært Dmitry Peskov, talsmanni hjá russiska forsetanum, Vladimir Putin, fara samrøðurnar í kvøld at snúgva seg um eitt uppskot um, hvussu kríggið kann fáa ein enda. Og so fara partarnir eisini at tosa um at býta um krígsfangar og at fáa burturflutt ukrainsk børn heimaftur úr Russlandi.

Mánadagin segði Dmitry Peskov, at Russland hevur sítt egna uppskot og Ukraina sítt egna, og tað er stórur munur á hesum báðum uppskotum.

Donald Trump hevur hótt við at seta hørð tiltøk í verk ímóti Russlandi, um tað ikki finst ein endi á krígnum í seinasta lagi um 50 dagar.