Henrik Sass Larsen dømdur treytaleysa fongsulsrevsing í fýra mánaðir

Fyrrverandi danski ráðharrin Henrik Sass Larsen er í dag dømdur fýra mánaðir treytaleysa fongsulsrevsing fyri at liggja inni við myndum, ið innihalda kynsliga misnýtslu av børnum.

Henrik Sass Lassen hevði 6.200 myndir og 2.200 sjónbandaupptøkur við slíkum tilfari. Fleiri av hesum vóru bólkaðar í grovasta bólkinum av slíkum tilfari.

Fyrrverandi sosialdemokratiski ráðharrin var eisini ákærdur fyri at hava eina barnadukku til kynsligt samband.

Men av tí at løgreglan ikki hevði lagt hald á dukkuna, tá fyrsta húsarannsóknin varð gjørd, bar ikki til at staðfesta, um Henrik Sass Larsen veruliga hevur brúkt hana til kynsligt samband. Tí bleiv hann fríkendur fyri hesa ákæruna.

Henrik Sass Larsen hevur ikki gjørt av enn, um hann fer at kæra dómin.