Økja hernaðarliga stuðulin til Ukraina

Um tvey-tíðina hildu danski forsætisráðharrin, Mette Frederiksen, og ukrainski forsetin, Volodomyr Zelenskyj, tíðindafund á Marienborg.

Fyrrapartin var fundur við ríkis- og stjórnarleiðarar í hinum Norðurlondunum og baltisku londunum.

Finnland, Litava, Svøríki, Lettland, Estland og Ísland vóru umboðað.

Londini hava í felags fráboðan sagt, at endamálið við fundinum var at vísa stuðul til Ukraina.

Zelenskyj og fundur við Norðanlond og baltisku londini

Frá fundinum, sum Zelenskyj hevði við ríkis- og stjórnarleiðarar í Norðurlondum og baltisku londunum í Keypmannahavn í dag. (Mynd: Ritzau Scanpix)

Putin vil ikki frið

- Putin vil ikki hava frið. Tað hava síðstu vikurnar víst, og tað hava vit sæð fleiri ferðir áður, skriva tey.

Londini siga eisini, at tey vilja økja hernaðarliga stuðulin til Ukraina, og mæla til fleiri revsitiltøk móti Russlandi. 

Danski forsætisráðharrin byrjaði tíðindafundin við at venda sær beinleiðis til Zelenskyj:

- Í dag ert tú millum vinir í einum landi, sum veit, hvat er í váða. Tit stríðast hvønn dag, og tað eru tit, sum verja Evropa fyri russiska áganginum, segði Mette Frederiksen.

Kroystast við revsitiltøkum

Zelenskyj vísti á týdningin at styrkja ukrainsku verjuna, bæði nú og í framtíðini.

- Russland skal kroystast við revsitiktøkum og tolli, segði hann:

- Hetta talar fyri seg sjálvt. Revsitiltøk rigga, og vit mugu halda fram at kroysta Russland við revsitiltøkum og tolli, segði Zelenskyj millum annað.