Miðlastuðul: Størri parturin skal fara til rakstur

Almanna- og mentamálaráðið sendi í gjár uppskotið um nýggja miðlastuðulslóg til hoyringar.

Tá sitandi samgonga varð skipað, varð gjørt av, at miðlalandslagið og Kringvarp Føroya skuldu styrkjast, og at miðlastuðulsskipanin skal stuðla undir hetta.

Sambært skrivinum frá Almanna- og heilsumálaráðnum hevur samgongan styrkt Kringvarp Føroya fíggjarliga, og nú vil hon, at játtanin til miðlastuðul skal hækkast munandi.

Uppskotið til nýggja miðlastuðulslóg leggur upp til, at størri partur av játtanini fer til rakstrarstuðul.

Eirikur í Jákupsstovu

Eirikur í Jákupsstovu, landsstýrismaður, eigur uppskotið um miðlastuðulslóg. 

60 prosent til skjalprógvaðar útreiðslur

Í verandi skipan fara 30 prosent av játtanini til rakstrarstuðul, men verður nýggja uppskotið samtykt óbroytt, fara 60 prosent til skjalprógvaðar útreiðslur til beinleiðis journalistiska framleiðslu hjá viðkomandi tíðindamiðli ella miðlasamtaki, sum tað stendur orðað.

Á tann hátt verður tað journalistiska framleiðslan, sum verður avgerandi fyri rakstrarstuðulin.

Men tað er ikki einasta broytingin.

Ein onnur stór broyting er, at farið verður burtur frá verkætlanarstuðlinum, sum hevur verið serstakliga illa dámdur í miðlaumhvørvinum.

Nýggir tíðindamiðlar

Í staðin verður veittur ein íverksetarastuðul, sum skal brúkast til at seta á stovn ein nýggjan tíðindamiðil í senn. Hetta seinasta verður gjørt, fyri at íverksetarastuðulin ikki verður ov smábýttur.

Tíðindamiðilin skal miðla sjálvstøðugt journalistiskt viðgjørt tilfar, stendur at lesa í skrivinum frá Almanna- og mentamálaráðnum, sum eisini sigur, at íverksetarastuðulin kann latast yvir fimm ár.

Les alt uppskotið her.