Yvirfriðingarnevndin: Fuglalívið í Klivaløkshaga skal kannast

Yvirfriðingarnevndin sleppir ikki ætlanini um, at alt fuglalívið í lendinum, har vindmyllur skulu setast upp í Klivaløkshaga á Sandi, verður kannað til fulnar. Tað merkir, at Yvirfriðingarnevndin heldur fast um avgerð sína í august.

Fyrst í september heitti Elveitingareftirlitið á Yvirfriðingarnevndina um at taka málið upp aftur, og sleppa kravinum um at kanna fuglalívið og hvussu fuglurin ferðast har á leiðini.

Elveitingareftirlitið sigur í skrivi til Yvirfriðingarnevndina, at Vernd hevur gjørt eina fakliga meting um ávirkanina á fuglalívið í økinum. 

Deildin Vernd, sum umsitur náttúruverndarlógina á Umhvørvisstovuni, kom til ta niðurstøðu, at "ætlanin fær lítlan ella ongan týdning fyri fuglastovnarnar".

Yvirfriðingarnevndin hevði aftur fund um málið 18. september, og hevur avgjørt ikki at ganga ynskinum hjá Elveitingareftirlitinum á møti.

Týðandi upplýsingar vanta

Nevndin heldur, at í hesum máli vanta týðandi upplýsingar um, hvørjar avleiðingar verkætlanin við vindmyllunum fer at hava á fuglastovnarnar í økinum. 

Í hesum sambandi vísir Yvirfriðingarnevndin eisini á ferðingina hjá fuglunum millum støðini, har fuglurin búleikast, til støðini, har fuglurin savnar sær føði. 

Tí samtykti Yvirfriðingarnevndin 13. august í ár, at hesin tátturin í náttúruni skal greinast, tí árinskanningin hjá Vernd umrøður ikki ferðingina hjá fugli.

Elveitingareftirlitið vísir í síni áheitan á Yvirfriðingarnevndina um at taka málið uppaftur, at vindmyllulundin er flutt longur norður.

Til tað skrivar Yvirfriðingarnevndin, at tað er ikki greitt, um nýggja staðsetingin hevur størri ella minni týdning fyri fuglastovnarnar ella ferðingina hjá fuglinum. Hesin parturin er ikki lýstur. Og ein meting hjá nevndini um nýggju staðsetingina kan ikki byggjast á ein varhuga.

Stórt fuglamargfeldi

Í niðurstøðu síni í august vísti Yvirfriðingarnevndin á, at økið frá vátlendinum við Søltuvík har vesturi, við Gróthúsvatni vestan fyri Sandsbygd, norður til Hálsavøtnini sunnan fyri Skopun og suður til Lítlavatn og Stóravatn, hevur størsta fuglamargfeldi í landinum. 

Yvirfriðingarnevndin krevur, at felagið, sum hevur fingið tilsøgn um vindmyllulundina í Sandoynni, ger eina kanning, sum varar eitt ár. Áðrenn kanningin verður sett í verk, skal Yvirfriðingarnevndin góðtaka kanningarætlanina.