Golden League: Vilja vinna á Hollandi eina ferð afturat

Føroyar vilja vinna á Hollandi eina ferð afturat, og tí fer hondbóltslandsliðið við monnum á vøllin við sterkastu uppstilling frá byrjan.

Tað sigur hjálparvenjarin, Hjalti Mohr Jacobsen við útvarpið hjá Kringvarpinum, undan fyrsta dystinum í Golden League-venjingarkappingini, sum byrjar í Tróndheimi í kvøld.

Føroysku hondbóltsmenninir spældu javnt og vunnu á hollendingum í farnu EM-undankappingini, og ætlanin er at úrslitið í kvøld skal vera eins gott.

 - Vit ætla at spæla við øllum, sum vit kunna, og so er tað kanska onkur av okkara lyklaleikarum, sum helst fáa steðg leygardagin, sigur Hjalti Mohr Jacobsen og vísir til dystin ímóti Norra.

Hetta merkir ikki neyðturviliga, at ungu spælararnir í hópinum ikki fáa kjansin í kvøld. 

 - Endamálið er, at allir skulu fáa spælitíð upp á hesar tríggjar dystirnar, men til dømis Høgni Heinason og Pauli Rasmussen eru við í hópinum í kvøld, og vónandi fáa teir sínar fyrstu minuttir, sigur hjálparvenjarin.

LES EISINI: Fáa kjansin í Golden League

EM er stóra málið

Flottasta venjingarkappingin, sum er. Soleiðis segði venjarin, Peter Bredsdorff-Larsen um Golden League, men evropameistarakappingin í januar er stóra málið.

 - Vit vilja fegnir gera eitt so gott avrik, sum gjørligt, og gjarna vinna, um møguleiki verður fyri tí, men tað er ikki tað, sum hevur størstan týdning. Tað er, at vit fáa vant tað, sum vit skulu brúka í januar, sigur Hjalti Mohr Jacobsen.

Føroyski hópurin kom til Tróndheim í gjár, og býr saman við hollendska, norska og danska landsliðshópunum.