Russland hóttir við at steingja marknaðir fyri føroyskum vørum

Russisku myndugleikarnir hótta nú við, at tað fær avleiðingar fyri Føroyar, um revsitiltøk verða sett í gildi móti russiskum fiskiskipum.

Ilja Sjestakov, leiðari fyri russiska fiskivinnu-agenturið, sigur seg vóna, at løgtingið fer at taka "ta røttu avgerðina." 

Tað skrivar russiska tíðindastovan, RIA Novosti.

Víðari sigur Ilja Sjestakov, at um Føroyar forða nøkrum russiskum skipum at fiska við Føroyar, so noyðist Russland at steingja sín marknað fyri føroyskum vørum.

- Vit hava alment ávarað Føroyar um møguligar avleiðingar av at seta revsitiltøk í verk. Vit vóna, at Føroya løgting tekur røttu avgerðina, sum ikki órógvar verandi samstarv millum londini á fiskiveiðuøkinum, sigur Ilya Shestakov sambært RIA Novosti.

Vildi sleppa í Uttanlandsnevndina

Herfyri bað annað av russisku reiðaríunum, sum landsstýrið vil seta á svartalista í Føroyum, um loyvi at tala sína sak í Uttanlandsnevndini hjá løgtinginum.

Í átta síður drúgvum skrivi til nevndina sigur advokaturin hjá Norebo, at eingi prógv eru fyri teimum uppáhaldum um ólógligt virksemi, ið ES hevur ført fram móti reiðarínum, og onnur lond síðani hava tikið undir við.

Norebo sleppur ikki at tala sína sak í Uttanlandsnevndini. Reiðaríið hevur tó fingið eitt skriv frá nevndini, har víst verður á, at teirra sjónarmið verða tikin við í viðgerðina. 

Bjarni Hammer, Suðuroyartunnil

Frítekst tagging: 

Bjarni Hammer

Suðuroyartunnil

Bjarni Árting Rubeksen

Bjarni Hammer.

Lata seg ikki hótta

Bjarni Hammer, formaður í Uttanlandsnevndini, sigur, at nevndin letur seg ikki hótta.

Hann sigur, at nevndin hevur ongan møguleika at eftirkanna, um hald er í hóttanini,

Uttanlandsnevndin skrivar nú álit í málinum, og tað verður væntandi lagt fyri tingið í næstu viku.

Hoyr samrøðu við Bjarna Hammer í útvarpstíðindunum:

Rætting, kl.15:34   Í greinini stendur, at Ilja Sjestakov, leiðari fyri russiska fiskivinnu-agenturið, sigur at um Føroyar forða nøkrum russiskum skipum at fiska við Føroyar, so noyðist Russland at steingja sín marknað fyri føroyskum vørum. Tað er ikki rætt, sambært upprunakelduni RIA Novosti. Sjestakov er bara endurgivin í samband við sjálvt fiskiveiðusamstarvið millum Russland og Føroyar. Hin parturin, hóttanin um innflutningsbann fyri føroyskar vørur, vísir aftur til líknandi støðu í 2023. Herfrá verður ein parallellur drigin til dagin í dag. Og tað er her, at feilurin í okkara grein eisini er íkomin. Haldið okkum til góðar!