USA fyrireikar peningagávu til grønlendingar

100 túsund dollarar, ella slakar 650.000 krónur, í lumman. Tað kunnu grønlendingar kanska gleða seg til.

Stjórnin í USA kannar nevniliga møguleikan at geva grønlendska fólkinum pengar. 

Tað siga fýra dulnevnd amerikonsk embætisfólk við tíðindastovuna Reuters.

Tvær av keldunum vilja vera við, at upphæddir millum 10 túsund og 100 túsund dollarar til hvønn einstakan grønlending eru nevndar.

Ógreitt er, hvussu hetta skal skipast, men endamálið er heilt greitt. Tað sigst vera at sannføra grønlendingar um at venda Danmark bakið, og at gerast partur av USA.

Hevur brúk fyri Grønlandi

Hugskotið at geva teimum umleið 56 túsund íbúgvunum í Grønlandi hvør sína peningagávu er eitt boð uppá, hvussu USA kann keypa Grønland.

Amerikanski forsetin, Donald Trump, hevur fleiri ferðir sagt, at USA hevur brúk fyri Grønlandi, av trygdarávum, og eitt uppskot frá honum hevur verið at keypa Grønland frá Danmark. 

Hetta hava bæði danskir og grønlendskir myndugleikar fleiri ferðir sagt kortanei til.