Glaðir fjepparar í Oslo

Føroyska innrásin í Oslo er nú at kalla fullkomin. 

Einir 6.000 føroyingar úr øllum heraðshornum eru nú komnir til norska høvuðsstaðin við flogfari ella við Norrønu at stuðla føroysku hondbóltsmonnunum, sum í kvøld spæla sín fyrsta dyst í EM-endaspælinum.

800 av fjepparunum búgva á einum og sama gistingarhúsi, Clarion, í hjartanum av Oslo. Har er manningin hjá Kringvarpinum eisini stødd. 

Longu í gjárkvøldið var gott lív í veitsluhøllini á Clarion.

Hølini vóru leigað til føroysku hondbóltsfjeppararnar, sum tóku sær av løttum og hugnaðu sær saman.

Kringvarpið var við og prátaði við fleiri fjepparar, sum vóru komnir til norska høvuðsstaðin.