Xi Jinping fer at vitja Trump í hesum árinum

Kinverski leiðarin, Xi Jinping, fer á almenna vitjan í Washington seinni í ár.

Tað segði amerikanski forsetin, Donald Trump, í samrøðu við NBC News í gjár.

- Xi Jinping kemur á vitjan í Hvítu húsunum, ja, fram móti ársenda, segði forsetin sambært NBC News, skrivar danska kringvarpið.

Donald Trump segði í sama viðfangi, at Kina og USA eru tvey øgiliga sterk lond, og at tey sita væl um sátt.

Frammanundan ætlar amerikanski forsetin sær á vitjan í Kina í apríl, har hann skal vitja kinverska forsetan.

Revsitollur

Síðan Donald Trump tók við aftur sum forseti í januar í fjør, hevur hann ferð eftir ferð brúkt toll sum politiskt amboð móti nógvum londum, teirra millum Kina.

Handilskríggið millum USA og Kina harðnaði í fjør, og eitt skifti var tollurin oman fyri 100 prosent.

Síðani hava londini bæði undirskrivað eina handilsavtalu, sum hevur til endamáls at linka spennigin millum londini bæði.