Fyrrverandi enski prinsurin Andrew handtikin

Fleiri enskir fjølmiðlar, eitt nú BBC, Sky News og aðrir, skriva, at fyrrverandi enski prinsurin Andrew Mountbatten-Windsor, ið er beiggi Chales kong, er handtikin.

Thames Valley løgreglan váttar, at tey hava handtikið ein mann frá Norfolk, sum er í sekstiárunum, og er undir illgruna fyri embætismisnýtslu. 

"Vit hava framt rannsaknir á bústøðum í Berkshire og Norfolk," skrivar løgreglan. 

Einki verður sagt um, hvør maðurin er. 

Andrew remains in custody as searches are carried out in Berkshire and Norfolk - follow live https://t.co/IO9UGcblEh

— BBC Breaking News (@BBCBreaking) February 19, 2026

Tað verður hildið, at handtøkan hevur samband við Epstein-skjølini. Sum skilst, so skal táverandi Andrew prinsur hava latið tilfar, sum var í trúnaði, til døma siðabrotsmannin Jeffrey Epstein, skrivar BBC. 

Talan er um eina frágreiðing um eina vitjan í Singapor, Hong Kong og Vietnam, umframt upplýsingar um íløgumøguleikar, sum vóru í trúnaði. 

Sambært almennu leiðreglunum, so hava fólk, sum eru sent út í handilsørindum fyri Bretland, tagnarskyldu um viðkvæmar, handilsligar og politiskar upplýsingar frá almennum vitjanum. 

Fyrrverandi prinsurin, Andrew, hevur staðiliga víst aftur, at hann skal hava gjørt nakað líknandi. 

Andrew Mountbatten Windsor bleiv í 2021 stevndur av Virginiu Giuffre, fyri at hava gjørt seg kynsliga inn á hana í 2014, tá hon var 17 ára gomul.

Í einari samrøðu við BBC frá 2019 tvíhelt táverandi Andrew prinsur, at hann ikki mintist at hava hitt Giuffre. 

Hóast Andrew Mountbatten Windsor noktaði at hava gjørt nakað galið, so gekk hann við til eina sjálvbodna sátt, áðrenn málið kom fyri í rættinum.