Friðarráðið fyri Gasa hevur fyrsta fundin í dag

Friðarráðið hjá Donaldi Trump, forseta, kemur saman fyri fyrstu ferð í dag.

Umboð úr 27 londum hittast í Washington býi.

Friðarráðið skal tosa um, hvussu Gasa skal fáast í trygga legu, og hvussu Gasa skal endurbyggjast.

Ráðið hevur fingið tvey ára heimild frá ST-trygdarráðnum til at hava eftirlit við vápnahvíldini.

Amerikanski forsetin hevur sagt, at friðarráðið er mætasta samkoma av leiðarum nakrantíð.

Talskvinnan í Hvítu húsunum, Caroline Leavitt, sigur, at limalondini hava givið tilsøgn um at brúka fimm milliardir dollarar, og londini hava eisini lovað at senda herfólk í túsundatali at tryggja frið, javnvág og støðufesti í økinum.

Nógv lond taka ikki av innbjóðingini

Donald Trump, forseti, er formaður í friðarráðnum og tað er hann, sum hevur boðið londum sum Hvítarusslandi, Saudiarabia, Pakistan og Ísrael at vera við.

Men nógv lond hava ikki tikið av innbjóðingini um at vera við í ráðnum.

Frakland, Stórabretland, Noreg, Svøríki, Týskland og seinast Vatikanið hava havnað tilboðnum. Vatikanið sigur, at tey meta, at Sameindu tjóðir eiga at standa fyri at loysa slíkar altjóða kreppur.

Danmark hevur ikki fingið innbjóðing, men danski uttanríkisráðharrin, Lars Løkke Rasmussen, sigur, at Danmark kortini fegið vil vera uppií, tá talan er um Gasa.