Løgmaður: Suðuroyartunnilin er størri enn samgongan

Aksel V. Johannesen, løgmaður, var nøgdur við, at bæði málini, ið hóttu samgonguna, pensjónsaldurin og Suðuroyartunnilin, blivu samtykt við aðru viðger. 

Løgmaður tók í ávísan mun undir við Ruth Vang, forkvinnu í Framsókn, at uppskotið hjá honum um fyrireiking, projektering og útboð av Suðuroyartunnlinum og tilhoyrandi tunnils- og vegakervi, ikki beinleiðis var eitt samgongumál. 

"Ætlanin um at byggja Suðuroyartunnilin er størri enn samgongan, tað eri eg samdur í. Tað er eitt mál, ið kemur øllum løgtinginum við. Júst tí hevur tað eisini verið umráðandi frá byrjan at hava alt løgtingið við í tilgongdini."

Aksel V. Johannesen, løgmaður, dugir væl at síggja, at tað sær eitt sindur órættvíst út, at allir tinglimirnir hjá javnaðarflokkinum noyðast at atkvøða fyri at hækka pensjónsaldurin, ið flokkurin hevur fingið nógvar atkoyringar fyri, meðan bert ein av trimum tinglimum hjá Framsókn atkvøður fyri Suðuroyartunlinum. 

Hoyr samrøðuna, ið Katrin Johannessen gjørdi við Aksel V. Johannesen, løgmann, her.