Troels Lund ætlar vera forsætisraðharri - Vinstri hevur afturgongd

Fyrsta veljarakanningin, síðani fólkatingsvalið var skrivað út í gjár, vísir, at flokkarnir á reyða veingi fáa 87 tingsessir og teir borgarligu 73

Troels Lund Poulsen, formaður í Vinstraflokkinum, hevur boðað frá, at hann er forsætisráðharraevni hjá borgarliga veinginum í fólkatinginum.

Mynd: Sebastian Elias Uth/Ritzau Scanpix

Jógvan Andrias Skeel Nolsøe

27.02.2026 - 09:02

Valstríðið upp undir fólkatingsvalið byrjaði illa hjá Vinstraflokkinum og formanni floksins, Troels Lund Poulsen, sum hevur boðað frá, at hann er forsætisráðharraevni hjá borgarliga veinginum í fólkatinginum.

Tað vísir nýggj veljarakanning, sum Epinion gjørdi fyri danska kringvarpið í gjár, eftir at Mette Frederiksen skrivaði út fólkatingsval at vera 24 mars.

Vinstriflokkurin gongur eitt prosentstig aftur samanborið við seinastu veljarakanning í januar. Flokkurin fær nú 8,9 prosent av atkvøðunum.

Tað svarar til 16 tingsessir.

Liberal Alliance størst

Av borgarligu flokkunum er Liberal Alliance størstur. Hann fær 10,2 prosent av atkvøðunum, sum er 2,3 prosentstig meira enn á fólkatingsvalinum í 2022.

Sambært nýggju veljarakanningini fáa flokkarnir á reyða veingi - teir eru Sosialdemokratarnir, SF, Alternativi flokkurin, Eindarlistin og Radikali Vinstraflokkurin - 87 sessir í fólkatinginum.

Borgarligu flokkarnir fáa tilsamans 73 sessir.