Kevin Warsh í uppskoti at gerast tjóðbankastjóri í USA

Hvítu húsini, ella Donald Trump, forseti, hava nú innstillað Kevin Warsh til starvið sum formaður fyri Federal Reserve System, ella The Fed, sum amerikanski tjóðbankin eisini verður kallaður. 

Í einari sera stuttari fráboðan, sum er send Senatinum, stendur at lesa, at Kevin Warsh úr Florida verður innstillaður til formanssessin næstu fýra árini, og so stendur eisini, at hann verður innstillaður til at gerast nevndarlimur í The Fed næstu 14 árini. 

Næsta stigið er, at Senatið skal góðkenna Kevin Warsh. Góðkenningar av hesum slagi kunnu taka tíð, kanska serliga, tá ósemjan millum veingirnar í amerikonskum politikki er so sjónlig, sum hon hevur verið seinastu árini.

Tað er tó lítið sannlíkt, at Senatið vrakar Kevin Warsh. 

Rentan stóra ávirkan

Tað er ikki bara sum at siga tað, at taka við sum ovasti leiðarin í amerikanska tjóðbankanum. Rentupolitikkurin hjá amerikanska tjóðbankanum hevur sera stóra ávirkan, ikki bara á amerikanska búskapin, men eisini heimsbúskapin.

Serliga hevur hetta seinasta árið verið baldrut.

Amerikanskur tjóðbanki, Jerome Powell - Mynd: Ritzau Scanpix

Jerome Powell, sum varð settur í starvi av Donald Trump í fyrra valskeiðnum, hevur verið fyri sera hvøssum atfinningum frá forsetanum fyri, at Tjóðbankin ikki hevur lækkað rentuna.

Sjálvt um tað er forsetin, sum tilnevnir nevndarformannin í Tjóðbankanum, og Senatið, sum góðkennir hann, er tætt skott ímillum stjórnina og Tjóðbankan. Stjórnin hevur tí onga ávirkan á rentupolitikkin, og tað er tað, sum forsetin hevur verið misnøgdur við seinasta árið.

Ikki er greitt, nær Senatið fer undir at góðkenningartilgongdina.