USA og Venesuela vilja hava diplomatisku viðurskiftini í rættlag

USA og Venesuela eru samd um at fáa diplomatisku viðurskiftini í rættlag aftur.

Tað sigur amerikanska uttanríkisráðið í eini fráboðan, sambært Reuters.

- Hetta stigið fer at lætta um okkara felags átøk at fremja støðufesti, endurreisa búskapin og stuðla politiskari semju í Venesuela, stendur í fráboðanini.

Hjálpa fólkinum

- Okkara raðfesting hevur til endamáls at hjálpa fólkinum í Venesuela at koma ígjøgnum eina stigvísa tilgongd, sum skapar fortreytirnar fyri einum friðarligum skifti til eina demokratiskt valda stjórn, stendur í fráboðanini.

Útsøgnin kemur, eftir at USA í januar tók nú frákoyrda forsetan í Venesuela, Nicolás Maduro, til fanga. 

Delcy Rodríguez, sum var varaforseti, er síðani sett sum fyribils forseti í suðuramerikanska landinum.