Bretska kravið um vakmyndatól er ódámligt, heldur fakfelagsformaður

7. mars komu bretsku krøvini um vakmyndatól á øllum skipum, sum fiska í bretskum sjógvi, í gildi. Upp undir gildiskomuna hava fleiri limir sett seg í samband við Føroya Skipara- og Navigatørfelag, sum 23. februar í telduposti spurdi føroyskar myndugleikar, hvørjar heimildir bretar hava fyri at seta slik krøv, sum felagi heldur vera ógvuliga ódámlig.

Hoyr innslag í útvarpstíðindunum

Tóri Højgaard, stjóri í Dátueftirlitinum, sigur, at tað tekur nakað av tíð at svara fyrispurninginum frá Føroya Skipara og Navigatørfelag, tí talan er um eina heldur torgreidda støðu, har skiljast má ímillum, nær og hvar føroysk lóg er galdandi, og nær talan er um, at bretsk lóggáva er galdandi.

Hoyr innslag í útvarpstíðindunum

Stjórin í Dátueftirlitinum heldur, at um endamálið hjá bretum til dømis er at hava eftirlit við, um fiskur verður blakaður út, so er tað eitt sakligt atlit eftir føroyskari lóggávu. Hann veit ikki, nær tey hava eitt svar klárt til Føroya Skipara- og Navigatørfelag, men væntar, at tað verður skjótt.