Jana Mittún: Máttu kempa fyri sigrinum

Eingin var meir avgerandi, tá føroysku hondbóltskvinnurnar vunnu 36-26 á Litava við Tjarnir, enn Jana Mittún.

Bakspælarin við nummar 77 á rygginum var her, har og allaðstaðni, tá Føroyar tryggjaðu sær framúr útgangsstøði undan returdystinum í Kaunas sunnudagin.

Men sigurin kom ikki uttan sveitta, segði ungi føroyski dirigenturin.

 - Vit skuldu kempa fyri at vinna. Í fyrra hálvleiki eru vit rættuliga javnar við tær. Vit brenna nokkso illa, men eg haldi, at sum frá líður í seinna hálvleiki, hava vit meir orku enn tær, segði Jana Mittún.

Bakspælarin úr Viborg HK skeyt sjálv níggju mál og legði upp til sjey, og tá tað so líðandi loysnaði frammanfyri stóru áskoðarafjøldini, varð spurningurin ikki um, men heldur hvussu nógv Føroyar fóru at vinna.

 - Tað lætti eitt sindur um, tá vit byrja at skora, og nervarnir runnu av okkum segði Jana Mittún, sum nú hevur góðar HM-vónir.

Kringvarpið vísir returdystin beinleiðis í sjónvarpinum sunnudagin frá klokkan 13.30.