Venjarin: Vit spældu ein flottan dyst

Tað var gamla søgan um ov nógvar brendar kjansir í tapinum fyri Montenegro í fyrsta HM-dystinum í Trier.

Tað ásannaði venjarin Claus Mogensen. Hann hevði kortini savnað kvinnurnar á vøllinum beint eftir dystin og sagt teimum, at tær høvdu spælt ein góðan dyst.

 - Vit eru ikki nóg effektiv upp á okkara kjansir, og tað er ein avbjóðing, sum vit eru greið yvir, at vit hava, men eg eri sera væl nøgdur við mátan, sum vit spæla dystin upp á, segði venjarin.

Føroyar komu væl frá byrjan og fóru nøkur mál framum tíðliga. Skjótt gekk kortini hinvegin, og Montenegro vann sær eina leiðslu, sum tær ikki mistu aftur. Viðhvørt hótti stórtapið, men málverjin Annika Fríðheim Petersen stóð væl, og verjan strammaði seg upp, og viðhvørt nærkaðust føroyingarnir aftur.

Tað gjørdist kortini ikki veruliga spennandi, tí Armelle Kelly Attingre ferð eftir ferð stórbjargaði mongu føroysku skotroyndunum frá opnum kjansum.

 - Vit vita, at tá tú spælir endaspæl, kann hvørt mál hava týdning, og tí er tað ikki so torført at varðveita fokus og royna eftir hvørjum máli, og tað haldi eg, at spælararnir hava rós uppiborið fyri, segði Claus Mogensen.