Hondbóltshetjurnar geva yngri spælarum íblástur

Hondbóltsrúsurin merkist framvegis her heima, nú fyrst A-landsliðið hjá kvinnunum stóðu seg væl í HM endaspælinum og mennirnir gjørdust akkurát ov stuttir at koma víðari úr Oslo í EM endaspælinum, sum enn er í gongd.

Hugurin var góður í Gundadalshøllini í Havn í kvøld, har U14 og U16-dreingirnir hjá Neistanum vandu til hálvfinalurnar í morgin.

Føroysku hondbóltshetjurnar, sum hava gjørt vart við seg í Trier, Oslo og í Berlin geva ungum leikarum íblástur.

- Vit hava sæð fleiri leikarir sum venja enn meira miðvíst enn áður, sigur Pætur Jakobsen, sum er næstformaður í hondbóltsfelagnum, Neistin.

Og halda teir seg framat, er møguleiki fyri at gerast eins góður leikari, sum Jana, Elias, Hákun, Súna ella onkur av hinum hondbóltshetjunum.

- Tað eru góð útlit fyri, at vit fara at síggja nógv góð úrslit í landsliðshøpi, sigur næstformaðurin hjá Neistanum.