Lógin skal ikki vera galdandi fyri løgtingið

Løgtingsins umboðsmaður og Landsgrannskoðanin mæla til, at lógin um persónsupplýsingar ikki verður galdandi fyri løgtingið og stovnar tess, í hesum førinum Løgtingsins umboðsmaður og Landsgrannskoðanin.

Løgfrøðingar hjá løgtinginum hava kannað hetta, og formansskapurin hjá løgtinginum mælir til at lurta eftir Løgtingsins umboðsmanni og Landsgrannskoðanini.

Tað er óheppið, at Løgtingsins umboðsmaður og Landsgrannskoðanin, sum eru eftirlitsstovnar hjá løgtinginum, skulu vera undir eftirliti hjá einum fyrisitingarmyndugleika, sum teir sjálvir hava eftirlit við.

Tá verður sipað til Dátueftirlitið. 

Rættarnevndin hjá løgtinginum, sum hevur uppskotið um dátuverndarlóg til viðgerðar, er biðin um at broyta uppskotið, áðrenn tað fer aftur í tingsalin.