Hálva millión dýrari enn játtanin

Játtaðar vóru 8,9 milliónir krónur til løgmann og landsstýrisfólk. Men, tá avtornaði, vóru brúktar 660.000 krónur meira enn tað.

Landsgrannskoðanin hevur fingið at vita frá Løgmansskrivstovuni, at tá fíggjarlóg fyri 2019 skuldi gerast, vístu tey á, at útskiftingar, sum hava við sær eyka útreiðslur til millum annað bíðiløn til fráfarin landsstýrisfólk, vóru væntandi.

Grundarlagið fyri játtanini í fjør var, at líka nógv landsstýrisfólk vóru eftir løgtingsvalið. Eisini varð roknað við, at helvtin av landsstýrisfólkunum vórðu skift. Men øll landsstýrisfólkini vórðu skift.

Bíðilønir kostaðu

Útskiftingin gjørdi, at átta fráfarin landsstýrisfólk skuldu hava bíðiløn í tríggjar ella seks mánaðir. Samstundis fóru landsstýrisfólkini úr átta niður í sjey. Eitt skifti var í landsstýrinum í 2018 og aftur eitt í 2019.

Landsstýriskvinnan í mentamálum, sum løgmaður tilnevndi í februar 2019, hevði rætt til 12 prosent í eftirløn. Tann, sum var í embætinum frammanundan, hevði ikki rætt til eftirløn. 

Landsstýrismaðurin, sum fór úr embætinum í 2018, fekk bíðiløn í januar og februar 2019.