Raducanu tók tennisheimin á bóli

Ein nýggj stjørna varð fødd í tennisheiminum í gjárkvøldið, tá 18 ára bretska Emma Raducanu vann Grand Slam kappingina US Open. 

Sostatt gjørdist hon fyrsta bretska kvinnan, sum hevur vunnið US Open í 44 ár, fyrsti US Open vinnari, sum hevur vunnið kappingina aftaná at hava spælt innleiðandi umfør og yngsti Grand Slam vinnari hjá kvinnum síðan Maria Sharapova vann Wimbledon í 2004.

Emma Raducanu vann á 19 ára gomlu Leylah Fernandez úr Kanada. Hon vann bæði settini 6-4 og 6-3.

Ferðin upp til tindarnar hevur verið skjót hjá  Emma Raducanu. Tað var ikki fyrr enn í juni, at hon gjørdist partur av WTA-kappingunum, og var US Open einans hennara næsta Grand Slam luttøka.

US Open er ein av teimum fýra stóru kappingunum í tennis, ið verða nevndar Grand Slam. Hinir tríggjar eru Wimbledon, French Open og Australian Open.