Putin ikki longur heiðursforseti í evropeisku judosamgonguni

Evropeiska judosamgongan hevur í dag tikið tittulin sum heiðursforseti frá Vladimir Putin.

Russiski forsetin er royndur judoíðkari og hevur svarta beltið. 

 - Við krígsstøðuni í Ukraina í huga, kunngerð EJU, at Vladimir Putin ikki longur er heiðursforseti í EJU, skrivar evropeiska judosambandið.

Avgerðin kemur ein dag eftir at forsetin í evropeisku judosamgonguni, Sergey Soloveychik, sum er russi, fór frá í gjár.

Formaðurin í Judo Føroyar, Sofus Debes Johannesen, sigur, at norðurlendsku judosambondini hava tosað saman síðstu daganar um støðuna, við tí í huga at heita á EJU og IJF, sum er altjóða judosamgongan, um at taka heiðursforsetatittulin frá Vladimir Putin, men at tað nú gjørdist óneyðugt við nakrari áheitan.

Í gjár tók IJF eisini tittulin sum heiðursforseti frá Vladimir Putin.