Heilsufrøðiliga starvsstovan góðkent føroyskt undirsjóvar-vodka

Heilsufrøðiliga starvsstovan hevur nú strikað sølubannið á serliga føroyska vodkanum hjá Faer Isles Distillery, sum er gjørt úr feskum vatni úr Sandoyartunlinum. 

Hetta boðar Faer Isles Distillery frá í tíðindaskrivi. 

North Atlantic Subsea Vodka, sum longu hevur vunnið gullheiðursmerki fyri sína dygd, skuldi koma á marknaðin herfyri, men varð tá afturhildið av Heilsufrøðiligu Starvstovuni. 

Orsøkin var, at feska vatnið úr Sandoyartunlinum ikki kom frá løggildum tappistaði, og vøran kundi tí ikki seljast.

Subsea vodka, Faer Isles Distillery

Vatnið og vodkað kannað og góðkent

Subsea Vodka er gjørt úr vatni úr einum stórum lumma við feskum vatni, ið varð funnin undir Heystfirði, tá ið Sandoyartunnilin varð boraður. 

Subsea Vodka bleiv beinanvegin sent inn til eina av fremstu altjóða kappingunum fyri vodka, The Vodka Masters. Kappingin hevur nakrar av bestu serfrøðingunum í heiminum í dómsnevndini.

1. september bleiv tað almannakunngjørt, at Subsea Vodka hevði vunnið gull í flokkinum Super Premium.

Nú hevur Heilsufrøðiliga starvsstovan kannað vodkað og vatnið, ið løgurin er gjørdur av, og allar kanningar vóru góðar.

Tí er sølubannið nú strikað, skrivar Faer Isles Distillery í tíðindaskrivinum. 

Subsea vodka, Faer Isles Distillery

Fyrstu fløskurnar av Subsea Vodkainum hjá Faer Isles Distillery fara til sølu í sølubúðunum hjá Rúsdrekkasølu landsins fríggjadagin 7. oktober. 

Hygg, hvussu tað sá út, tá ið vertirnir í Góðan Morgun Føroyar royndu Subsea Vodka.