Biden: Ósannlíkt at Russland skeyt rakettina

Amerikanski forsetin, Joe Biden, sigur, at sambært fyribils upplýsingum er ósannlíkt, at rakettin, sum drap tvey fólk í Póllandi í gjár, var skotin úr Russlandi.

Tað skrivar Reuters.

Forsetin sigur tó einki um, hvør kann hava skotið rakettina.

Amerikanskir embætismenn siga, at tað vóru ukrainskar deildir, sum skutu rakettina, sigur ein tíðindamaður hjá AP, sum hevur tosað við ónevndu keldurnar.

Rakett í Póllandi

Rakettin datt niður í pólskt øki nærindis ukrainska markinum og drap tvey fólk. 

Gjørd í Russlandi

Ukrainskir og pólskir myndugleikar vilja vera við, at rakettin var gjørd í Russlandi.

Russland hevur víst aftur, at landið hevur skotið rakettir inn í Pólland. 

Alment verður einki sagt um, hvaðani rakettin var skotin.

Joe Biden sigur, at USA fer at hjálpa Póllandi at fáa greiði á, hvat er hent. Amerikanski forsetin er í løtuni á G20-toppfundi á Bali í Indonesia.