Amerikanski miðbankin hækkar rentuna í kvøld

Amerikanski miðbankin fer væntandi í kvøld at hækka leiðandi rentuna.

Miðbankastjórin, Jerome Powell, kunnger avgerðina kl. 19 í kvøld, og serfrøðingar rokna við, at hækkingin verður 0,25 prosentstig, úr 4,5  upp í 4,75 prosent.

Hetta verður sostatt áttanda rentuhækkingin á rað hjá Federal Reserve, men hon verður neyvan so stór, sum seinastu tvær hækkingarnar hava verið. Tær vóru 0,5 og 0,75 prosentstig.

Jerome Powell

Jerome Powell er miðbankastjóri í USA. (Mynd: Ritzau Scanpix)

Trýstið linkar

Inflatiónstrýstið í USA er minkað seinastu mánaðirnar, fleiri tøknirisar hava boðað frá uppsagnum, og amerikonsk húsarhald brúka minni pening.

Stóri spurningurin er, um miðbankin heldur, at arbeiðsmarknaðurin er í ferð við at verða køldur nóg nógv.

Í desember metti bankin í forsøgn síni, at leiðandi rentan skuldi upp á fimm til 5,25 prosent í 2023, og tað merkir, at tvær rentuhækkingar helst koma aftrat.

Størri álit

Álitið hjá íleggjarum á amerikanska búskapin er betri nú, og tað sæst aftur í amerikanska keypsskálanum, har pílarnir hava peikað uppeftir seinastu mánaðirnar.

Dow Jones-vísitalið í New York er vaksið góð seks prosent seinastu tríggjar mánaðirnar, og Nasdaq-vísitalið er vaksið 10,7 prosent síðani ársskiftið, skrivar NTB.