Lauritz.com farin á húsagang

Kenda danska uppboðssølan, Lauritz.com, er farin á húsagang

Tað skrivar Jyllands-Posten.

Bústjóri sigur, at virksemið kann halda fram við nýggjum eigarum.

Tað hevur staðið illa til hjá uppboðssøluni í longri tíð. 28. juni var almannakunngjørt, at Lauritz.com skuldi endurskipast. Men nú er uppboðssølan farin endaliga á húsagang.

Samráðingar við keyparar

Sambært skiftastjóranum hava samráðingar verið við fleiri møguligar keyparar í umskipanartíðini seinastu tvær vikurnar. Hann væntar, at samráðingarnar halda fram, og at avtala verður gjørd við nýggjan eigara, áðrenn langt um líður, so  virksemið við Lauritz.com kann halda fram.

Lauritz.com skyldar viðskiftafólkum sínum meira enn 50 milliónir krónur.

Finans.dk skrivar, at fólk, sum hava selt vørur á uppboðssølu, hava ikki fingið sínar pengar, og onnur, sum hava keypt vørur á uppboðssølu, hava ongantíð fingið vøruna.

Skuldin hjá Lauritz.com fevnir tó ikki bert um tær 50 milliónirnar, sum viðskiftafólkini eiga til góðar hjá uppboðssøluni. 

Samlaða skuldin hjá fyritøkuni er heilar 171,5 mió. krónur.