Føroyingar fáa 5G um árskiftið

Nú nærkast av álvara til, at føroyingar fáa atgongd til 5G. 

Hetta boðar Føroya Tele frá í tíðindaskrivi. 

"Tað harmar okkum, at 5G er seinkað, og at kundar framvegis ikki hava fingið atgongd til 5G og hentleikarnar, sum nýggja farnetið fer at bjóða. Nú sær tó bjartari út, og vit eru fegin um, at 5G tendrar um ársskiftið," sigur Símun Skaalum, stjóri í FT Samskifti.

Lagt um til Ericsson kjarnutøkni

Fyri einum ári síðani var liðugt at skifta sendistøðir og seta nýggjar upp. Síðani hevur arbeiðið snúð seg um at neyvstillað og leggja um til Ericsson kjarnutøknina.

Í fjør heyst skrivaðu Nema og FT Samskifti undir avtalu um, at Nema knýtir í 5G-netið, sum eru sendistøðirnar í nýggja Ericsson-farnetinum hjá Føroya Tele. Avtalan fevnir um javnsetta atgongd til sendistøðirnar, men ikki um kjarnutøknina á farnetinum.

Sostatt fáa kundarnir sama dekning, somu ferð og sama kapasitet, meðan veitararnir framhaldandi tryggja kapping á marknaðinum við at hava hvør sína kjarnutøkni, har teir kunnu veita sínar serstøku tænastur.