50 kuldastig í Sibiria

Her heima hava vit havt nakað av kulda, men tað er lítið samanborið við Sibiria. Har eru minus 50 stig nógvastaðni.

Millum annað eru mátað minus 50 stig í býnum Jakutsk í Sakha-lýðveldinum, sum er ein av heimsins kaldastu býum. 

Íbúgvar í býnum eru vanir við so ógvusligan kulda, men tað er óvanligt, at hann kemur hesa ársins tíð.

Minus 50 stig eru mátað nógvastaðni í Sakha. 

Lýðveldið er nærum líka stórt sum India, og har er frostjørð, permafrost, í meginpartinum av økinum.

Í øðrum pørtum av Russlandi hevur nógvur kavi elvt til trupulleikar. 

Í Moskva eru fleiri flogfør seinkað ella avlýst, og minus 18 stig vóru í Moskva í seinastu viku.