Trump vil hava hægstarætt at taka støðu til valbæri

Fyrrverandi amerikanski forsetin, Donald Trump, vil hava hægstarætt í USA at taka støðu til, um hann kann bjóða seg fram í republikansku uppstillingarvalunum. 

Tað upplýsir hægstirættur í einum skjali, sambært DR.

Áheitanin hjá Trump kemur, eftir at hægstirættur í statinum Colorado í desember gjørdi av, at Trump kann ikki standa á atkvøðuseðlinum til uppstillingarvalið seinni í ár. 

Í avgerðini stóð, at Trump var virkin í uppreistrinum, sum førdi til álopið á amerikonsku kongressina í januar í 2021.

Men sakførararnir hjá fyrrverandi forsetanum siga, at spurningurin um valbæri eigur ikki at verða avgjørdur í hvørjum einstøkum stati.

Í statinum Maine er Trump eisini útihýstur frá uppstillingarvalinum. Trump og hansara fólk hava kært hesa avgerð.