Flogskipararnir vistu einki um eldin í flogfarinum

Flogskipararnir á flogfarinum, sum setti seg í Haneda-floghavnini í Tokyo fyrr í vikuni, vistu einki um, at eldur var í flogfarinum, fyrr enn ein flogterna kunnaði teir um tað.

Tað sigur ein talsmaður fyri Japan Airlines við BBC. 

Tá flogfarið hevði sett seg, varnaðust flogskipararnir, at okkurt var á vási, tí teir fingu ikki hildið flogfarinum á lendingarbreytini. Men teir vistu einki um, at eldur var í flogfarinum, fyrr enn teir vóru kunnaðir um tað.

Síðani var farið at flyta øll 379 fólkini úr flogfarinum, og tað gekst væl. 18 minuttir seinni vóru øll fingin úr flogfarinum í øllum góðum.

Brúktu róparar

Hátalaraskipanin í flogfarinum hevði fingið skaða, og tí noyddist manningin at brúka róparar at geva ferðafólkunum boð. 

Eldur kom í Airbus-flogfarið hjá Japan Airlines, tá tað stoytti saman við eitt minni flogfar í floghavnini.

Seks fólk vóru í hesum flogfarinum, men bara flogskiparin kom frá vanlukkuni við lívinum. 

Japanskir, bretskir og franskir flogserfrøðingar eru farnir at kanna, hví flogførini stoyttu saman.