Fleiri milliónir til almenna bygging

Enn ein almenn bygging skal hava fleiri pengar enn av fyrstan tíð vóru játtaðir.

Nú er talan um sambýlið til fólk við menningartarni og fjølbreki í Reynstúni á Argjum.

Í 2022 læt løgtingið 54 milliónir til byggjaríið.

Nú biður Almannaráðið um tvær milliónir aftrat.

Indeksregulering, tað er at justera prísir, kostar 800.000 kr. meira, longd byggitíð 800.000 kr. og biðið er um 400.000 kr. í eyka tiltakspeningi.

Sambært galdandi tíðarætlan skuldi byggingin vera liðug um ein mánað, men hetta verður seinkað nakrar mánaðir.

Tær tvær milliónirnar, biðið er um nú, eru tøkar í fíggjarlógini fyri 2024, sigur Almannaráðið.

Tað eru tær, tí sambýlið á Mýrini bleiv bíligari enn mett.