Ungarn kortini til reiðar at hjálpa Ukraina

Ungarska stjórnin er nú til reiðar at seta milliardir av í stuðli til Ukraina á fíggjarlógini hjá ES.

Tað skrivar Balázs Orban, sum er politiskur stjóri hjá Viktor Orban, forsætisráðharra, á sosiala miðlinum X.

Í desember brúkti ungarski forsætisráðharrin annars sýtingarrættin móti uppskotinum hjá ES um at játta umleið 373 milliardir kr. í okkara peningi til krígsherjaða Ukraina. 

Tað fekk øði í aðrar ríkis- og stjórnarleiðarar í ES, sum taka undir við hjálparpakkanum.

Nú hevur Ukraina eftir øllum at døma hálsað um.

Vil hava neyðbremsu

Balázs Orban vil kortini hava eina neyðbremsu, soleiðis at Ungarn fær møguleika at broyta støðu.

Tað hava hini ES-londini langt síðani víst aftur.

Politiski stjórin hjá Orban, forsætisráðharra, leggur dent á, at ES hevur lagt trýst á ungarsku stjórnina um at broyta støðu í málinum.

Fyrr í dag frættist, at ES-londini arbeiða við eini ætlan um at skaða ungarska búskapin við ymsum tiltøkum, so Ungarn ikki aftur brúkar sýtingarrætt síni móti hjálparpakkanum til Ukraina.

Málið kemur til viðgerðar á ES-toppfundinum hósdagin.