Klagaði BankNordik fyri ógreið boð um gjaldskort

Boðini vóru ikki nóg greið og týðilig.

Tí misti eitt viðskiftafólk hjá BankNordik 8.000 kr.

Brúkaraumboðið hevur viðgjørt eina klagu, sum fevnir um sms-boðini, sum verða send, tá fólk skulu virkja kortið í Apple Pay. 

Klagarin metti ikki, at sms-boðini frá BankNordik vóru nóg greið til, at fólk skiltu álvaran í teimum.

BankNordik sigur, at klagarin skal sjálvur ábyrgjast, tí hann vísti grova, óforsvarliga atferð, tá hann gjørdi kortið virkið.

Fekk allar pengarnar, uttan 375 kr.

Klagarin heldur, at hann skal bara ábyrgjast fyri 375 krónum, tí sms-boðini frá BankNordik vóru ikki nóg greið til, at fólk skiltu álvaran í teimum. 

Tað heldur Brúkaraumboðið eisini, og hevur biðið BankNordik um at orða boðini greiðari.

BankNordik hevur síðani latið klagaranum allar pengarnar, uttan 375 kr. 

Brúkaraumboðið tekur ikki ítøkiliga avgerð, um klagarin skal gjalda allar 8.000 kr. ella 375 kr. 

Det Finansielle Ankenævn viðger ítøkilig mál millum viðskiftafólk og peningastovn.