Putin fekk meira enn 87 prosent av atkvøðunum

"Russland, Russland, Russland!"

Tað vóru lógvabrestir og fagnaðarróp frá viðhaldsfólki, tá Vladimir Putin, forseti, í gjárkvøldið lýsti valsigurin.

Ikki óvæntað vann Putin russiska forsetavalið við greiðum meiriluta. Mett verður, at hann hevur fingið yvir 87 prosent av atkvøðunum. Enn eru ikki allar atkvøður taldar. 

Tríggir aðrir menn stillaðu eisini upp til forsetavalið,  men allir stuðlaðu politikkinum hjá Putin. Eingin frá andstøðuni stillaði upp. Tí hava viðmerkjarar sagt, at valið heldur hevur verið ein tilnevning heldur enn eitt veruligt fólkaræðiligt val, hóast Russland roynir at látast sum um, at valið er demokratiskt.  

Forsetaval í Russlandi - úrslit

Sum væntað vann Putin russiska forsetavalið. (Mynd: Reuters/Ritzau Scanpix)

Vandi fyri triðja heimskríggi

Tá ið Vladimir Putin tók orðið í gjárkvøldið, takkaði hann sínum stuðlum og hermonnunum á hermótinum.

- Hesin sigurin merkir, at Russland verður sterkari. Um vesturheimurin sendir hermenn til Ukraina, er vandi fyri triðja heimskríggi, segði Putin m.a.

Hóast greiðan sigur, var mótmæli á síðsta valdegnum.

Julia Navalnaja

Julija Navalnaja heitti á veljararnar um at vísa sína misnøgd við forsetvalið. (Mynd: AFP/Ritzau Scanpix)

Einkjan hjá fyrrverandi andstøðupolitikaranum, Aleksej Navalnyj, Julija Navalnaja, hevði undan forsetavalinum heitt á fólk um at møta upp við valstøðini á middegi, fyri at vísa sína ónøgd við Kreml.

Og júst á middegi vóru langar bíðirøðir við valstøðini. Talsfólk hjá Putin hevur tó víst aftur, at longu røðirnar høvdu nakað við áheitanina hjá Juliju Navalnaja at gera.