Grønlendskar kommunur fáa 18 mió. kr. í kassan frá ferðafólkum í skipum

Í Grønlandi kunnu kommunurnar nú gleða seg til, at milliónir av krónum frá ferðafólkum umborð á ferðafólkaskipum byrja at rapa niður í kommunukassan. 

Árstíðin fyri ferðafólkaskip í Grønlandi byrjar nevniliga í dag, tá ið ferðafólkaskipið MSC Poesia við 2.500 ferðafólkum kemur til Nuuk. 

Á nýggjárinum fingu kommunurnar í Grønlandi heimild at krevja eitt umhvørvis- og røktarómaksgjald frá ferðafólkum umborð á ferðafólkaskipum - í mesta lagi 50 krónur fyri hvørt ferðafólkið. 

Allar kommunurnar hava avgjørt at krevja hægst loyvda gjaldið uttan ein kommuna. Tað er Qeqertalik, ið einans fer at krevja 25 krónur frá hvørjum ferðafólki í eini roynd at lokka fleiri ferðamannaskip til kommununa. 

Hetta skrivar grønlendska kringvarpið, KNR. 

18 mió. kr. í kommunukassarnar

Tað verður væntað, at grønlendsku kommunurnar í ár fáa 18 milliónir í kommunukassarnar frá ferðafólkum, sum koma til Grønlands við ferðafólkaskipum. Grønlendski landskassin fær 17 milliónir krónur.

Visit Greenland hevur skrásett 681 komur hjá ferðafólkaskipum í ár.

Tað gevur samanlagt 343.871 ferðafólk í teimum 19 havnunum í Grønlandi, sum ferðafólkaskipini brúka. 

Skip, sum eru størri enn 30.000 tons, skulu rinda dupult so stórt havnargjald.