Elias og Kiel ovurstóra uppgávu í Champions League

Elias Ellefsen á Skipagøtu og THW Kiel hava brúk fyri einum undri á Wunderino Arena, tá Montpellier vitjar í Champions League í kvøld.

Fraklendingarnir vunnu stórsigur í fyrru fjórðingsfinaluni, og um føroyski spælskiparin og hinir í hvítum og svørtum skulu víðari til endaspælið, sonevnda Final4, mugu teir vinna við minst níggju málum.

Norðurtýskararnir mugu kanska klára seg uttan Elias Ellefsen á Skipagøtu, sum fekk skaða í knæið fyri kortum. Fyri Kringvarpinum segði spælskiparin kortini, at skaðin ikki er álvarsligur, og at hann væntaði at verða klárur aftur skjótt.

Um hann verður á vøllinum longu í kvøld, er ikki greitt.