FIFA atkvøður um at koyra Ísrael úr altjóða kappingum

Limalondini í altjóða fótbóltssamgonguni FIFA fara í morgin at atkvøða um at koyra Ísrael úr altjóða fótbóltskappingum.

Tað var palestinska fótbóltssambandið PFA, sum 11. mars í ár sendi FIFA eitt uppskot um at koyra Ísrael úr altjóða fótbóltssamgonguni, sum eina avleiðing av stríðnum í Gasa.

Í morgin møtast FIFA-londini so á ársfundi í Bangkok, har støða millum annað skal takast til palestinska uppskotið.

PFA: Ísrael brotið fleiri reglur

Sambært PFA hevur Ísrael brotið fleiri reglur hjá FIFA, millum annað regluna um ikki at vísa diskriminatión móti einum landi ella fólkaslagi.

Ein talsmaður hjá ísraelska fótbóltssambandinum IFA sigur sambært New York Times, at áheitanin hjá palestinska fótbóltssambandinum er "kynisk og skammleys".

Seinast FIFA útihýsti einum landi frá altjóða kappingum var í 2022, tá Russland varð útihýst frá HM-kappingini í Katar, samstundis sum russisk feløg ikki sluppu at luttaka í evropeiskum kappingum.

Ársfundurin hjá FIFA byrjar í morgin og varar í tríggjar dagar.