ICC givið boð um at handtaka tveir russiskar verjuleiðarar

Altjóða revsidómstólurin ICC hevur givið boð um at handtaka teir báðar russisku verjuleiðararnar, Sergej Sjojgu og Valery Gerasimov.

Sjojgu er fyrrverandi russiskur verjumálaráðharri, og Gerasimov er verjuovasti í russiska herinum. 

ICC skrivar, at teir báðir eru ákærdir fyri krígsbrotsverk og brotsverk móti mannaættini. 

Álop á sivilfólk

Dómstólurin sigur, at teir hava lagt til rættis álop á sivilfólk í Ukraina og álop á sivila orkuundirstøðukervið í landinum.

Hetta skal vera hent í tíðarskeiðnum millum 10. oktober 2022 og 10.mars 2023. 

Tá var Sjojgu verjumálaráðharri í Russlandi, og Gerasimov var eisini tá verjuovasti.

Boðini um handtøkunar koma sama dag sum Evropiski mannarættindadómstólurin, EMD, kunngjørdi niðurstøðuna um, at Russland hevur framt fleiri mannarættindabrot á Krim-hálvoynni, síðani landið hertók hálvoynna í 2014.