- Tíðindi, mentan og ítróttur
Ferðavinnufelagið: Bátar undir landi eiga at kunna at sigla skjótari
![](https://kvf.fo/sites/default/files/styles/grein-ovasta-mynd/public/lomvigi_lomvigar.jpg?itok=Zr2trCvP)
Ferðavinnufelagið heldur, at hámarksferðin hjá bátum tætt við land eigur at vera 10 til 15 fjórðingar, og ikki átta fjórðingar, sum uppskotið um kunngerðina, ið skal verja bjargafugl, sigur.
Ferðavinnufelagið vil hava longri freist at viðgera uppskotið, sum er sent til hoyringar.
Freistin var til 28. august, men er nú longd til 11. september.
Ferðavinnufelagið harmast um, at uppskotið var sent til hoyringar mitt í summarhálvuni. Tá hava ferðavinnuveitarar nógv at gera og tí avmarkaða tíð at viðgera uppskotið gjølla, sigur felagið.
Torført at hava eftirlit
Ferðavinnufelagið sigur, at torført verður at hava eftirlit við reglugerðini um sigling.
Tí mælir felagið staðiliga til, at hámarksferðin verður hækkað.
Sambært uppskotinum skulu reglurnar um hámarksferð ikki vera galdandi, tá ikki ber til at sigla spakuliga fyri veður.
Men verður hámarksferðin hækkað upp í 10-15 fjórðingar um tíman, verður ein veruligur møguleiki at halda reglugerðina, heldur Ferðavinnufelagið.