Ivi um eftirlønir hjá landsstýrisfólki

Løgtingsins umboðsmaður hevur biðið Løgmansskrivstovuna um at tulka lógina um eftirløn hjá landsstýrisfólki av nýggjum.

Umboðsmaðurin fekk klagu um, at Løgmansskrivstovan ikki tulkar reglurnar um eftirløn við 60 ára aldur í lógini um eftirløn hjá landsstýrisfólki rætt.

Klagan var um, at Løgmansskrivstovan hevur tulkað reglurnar um eftirløn til landsstýrisfólk við 60 ára aldur á slíkan hátt, at klagarin ikki hevði rætt til eftirløn við 60 ára aldur.

Umboðsmaðurin vísir á, at eftirlønarskipanin hjá landsstýrisfólkum var broytt í 2015.

Tá var farið frá eini tænastumannalíknandi eftirlønarskipan til eina skipan, sum líkist teirri skipan, sum er vanlig hjá alment settum starvsfólkum, sum ikki eru tænastufólk. 

Tá var samstundis gjørd ein skiftisskipan fyri landsstýrisfólk, sum eru ella hava verið landsstýrisfólk. 

Lógarbroytingin, kunngerðin og forarbeiðið til lógarbroytingina svaraðu ikki greitt, hvussu reglurnar um skiftisskipanina skuldu skiljast, sigur Løgtingsins umboðsmaður.

Umboðsmaðurin heitir á Løgmansskrivstovuna um at viðgera málið av nýggjum og lata seg frætta, hvat hendir.