FM í vegsúkkling: Tveir ímóti einum á Sandoynni

Tað vóru tveir ímóti einum, tá súkklað var um føroyameistaraheitið í vegsúkkling á Sandoynni.

Liðfelagarnir úr Fjallasúkklufelagnum, Helgi Winther Olsen og Niklas Hallgren Niclassen, arbeiddu saman fyri at sleppa av við Paula Poulsen úr Norðstrok, og tað eydnaðist tíðliga á 102 kilometra langa teininum. 

Helgi Winther Olsen fór undan mestsum beinanvegin, men seinni bíðaði hann eftir Niklas Hallgren Niclassen, tá hesin setti ferð á á veg niðan úr Dali og Pauli Poulsen ikki kláraði at fylgja við.

Teir báðir úr Fjallasúkklufelagnum kundu nú skiftast um at hála, meðan Pauli Poulsen mátti stríðast ímóti brekkunum og vindinum einsamallur, og tí vaks munurin upp í eitt gott korter.

Helgi Winther Olsen, sum í summar hevur vunnið FM í bæði triathlon og einkultstarti, tryggjaði sær eisini gullið í vegsúkklingini við einum góðum endaspurti á málinum í Skálavík.