Skúvoy verndarøki

Tey hava heitt á Umhvørvisstovuna um at verja oynna við heimild í Náttúruverndarlógini.

- Tað er neyðugt at gera meira fyri at verja fuglin móti vaksandi ferðafólkatalinum, sigur Harry Jensen, kommunustýrislimur og formaður í ramsarnevndini fyri Skúvoy.

Fríggjadagin 25. oktober verður borgarafundur í Skúvoy um møguligt verndarøki.

Á fundinum verður kunnað um tilgongdina, tá arbeitt verður við at gera eina verndarkunngerð, og hvussu fólk og aðrir áhugapartar kunnu veita upplýsingar, sum eru viðkomandi fyri skipan av verndini.

Skúvoy hevur serliga náttúru og er frammanundan eitt ramsar-verndarøki við altjóða týdningi fyri fugl.

Í viðgerðini av eini møguligari náttúruvernd av Skúvoy verður dentur lagdur á at hava eina tilgongd, har øll sjónarmið verða tikin við í viðgerðini av verndarøkinum. Tí verður m.a. skipað fyri almennum fundi.

Áðrenn endalig verndarkunngerð verður orðað, ger Umhvørvisstovan eina verndarætlan við týdningarmestu avleiðingunum, sum økisverndin kann væntast at fáa.

Í hesum sambandi vil Umhvørvisstovan fegin hoyra frá øllum, sum hava eina vitan, sum kann hava týdning fyri verndina av Skúvoy.