Fyrrverandi aðalskrivarin skrivar bók um NATO

Jens Stoltenberg er á veg við nýggjari bók um lívið sum aðalskrivari í NATO

Í nýggju bókini við heitinum ‘On my watch’ fer fyrrverandi aðalskrivarin í NATO, Jens Stoltenberg, at greiða frá teimum tíggju árunum, hann sat sum ovasti í verjusamgonguni.

Tað boðar forlagið Gyldendal, sambært NRK, í tíðindaskrivi.

- Hetta er mín søga, hvussu tað hevur verið at standa á odda fyri heimsins máttmiklastu hernaðarsamgongu í eini lagnutíð fyri okkara trygd, sigur Stoltenberg í tíðindaskrivinum.

Jens Stoltenberg røkti starvið sum aðalskrivari í NATO frá 2014 til 2024, tá niðurlendingurin Mark Rutte tók við starvinum 1. oktober.

Bókin kemur út næsta heyst.