Familjudepilin hjá Almannaverkinum verður Familjutænastan hjá kommununum

Familjudepilin hjá Almannaverkinum verður nú Familjutænastan hjá kommununum.

Djóni Nolsøe Joensen, landsstýrismaður, og formansskapurin í Kommunufelagnum, borgarstjórarnir Torbjørn Jacobsen og Heðin Mortensen, hava undirskrivað avtalu um Familjutænastuna.

Hon skal í eitt tríára royndarskeið rekast sum kommunalur stovnur hjá Kommunufelagnum. 

Familjutænastan er fyribyrgjandi tænasta, sum skal veita ráðgeving og vegleiðing til børn og familjur, sum hava avbjóðingar. 

Tænastan skal bjóða fram familjuviðgerð, har møguleiki bæði er fyri samdøgursviðgerð og dagviðgerð hjá Familjutænastuni og úti í heimunum.  

Kommunufelagið

Familjutænastan verður knýtt at Barnaverndarstovuni hjá Kommunufelagnum.

Fýra milliónir frá landinum

Fíggingin frá landinum verður eftir ætlan fýra mió. kr. um árið.

Hetta er tað sama, sum Familjudepilin hjá Almannaverkinum brúkti til samdøgurtilboðið. 

Aftrat hesum verður eitt brúkaragjald frá kommunalu barnaverndartænastunum til at keypa tænastur frá Familjutænastuni. 

Familjutænastan verður knýtt at Barnaverndarstovuni hjá Kommunufelagnum.

Søkja eftir leiðara

Søkt er eftir leiðara til Familjutænastuna, og Kommunufelagið finnur hóskandi høli til virksemið. 

Miðað verður eftir at lata Familjutænastuna upp 1. januar 2025. 

Familjudepilin hjá Almannaverkinum hevur ikki virkað síðani januar 2022.