Aftur ein óstøðug og óviss vika

Í dag er altjóða kvinnudagur, og tað setir dám á vikukjakið.

Vit kjakast um minkandi føðitíttleika og avbjóðingar hjá smábarnafamiljum. Hvørjar eru orsøkirnar til hetta? Eru tað samfelagsligar og fíggjarligar avbjóðingar, ein nýggjur hugburður ella vantandi javnstøða? 

Aftur hesa vikuna hevur Donald Trump fylt heimspressuna á tremur. Í vikuni boðaði hann frá, at amerikanska stjórnin fyribils tekur aftur hernaðarstuðulin og hernaðarupplýsingar frá USA til Ukraina. Amerikanska stjórnin ætlar sær eisini at taka aftur fyribils uppihaldsloyvini hjá um 240.000 ukrainskum flóttum. Ber til hjá vanligum borgarum og eisini hjá politikarum at fylgja við øllum útsagnunum hjá Trump, og hvat kann ES gera við støðuna, spyrja vit vikupanelið.

Og so kjakast við um landsstýrisrokaduna, sum Tjóðveldi boðaði frá í gjár. Jóhan Christiansen verður landsstýrismaður í fiskivinnu- og samferðslumálum. Eirikur í Jákupsstovu, løgtingsmaður, fer í landsstýrið at umsita almanna- og mentamál, og Sirið Stenberg, forkvinna í Tjóðveldi, sum hevur umsitið almanna- og mentamál, fer nú at umsita uttanríkis- og vinnumál fyri Høgna Hoydal, sum fer aftur í løgtingið. Er rokadan ein strategisk góð ætlan hjá Tjóðveldi, hugleiða vit um. 

Lurtið eftir vikukjakinum her: