Mótimælisgonga móti Trump í Grønlandi í morgin

- NÚ ER TAÐ NOKK!, skrivar Orla Joelsen í einum uppslagi á Facebook.

Hon vísir til seinastu útsøgnina hjá Trump mikudagin, har hann aftur nevndi ynskið um at yvirtaka Grønland.

Í tí sambandi hevur hon tikið stig til eina mótimælisgongu í morgin, leygardagin, sum mótmæli móti útsøgnunum hjá amerikanska forsetanum, Donald Trump.

Ganga móti konsulátinum í Nuuk

Mótmælisgongan byrjar klokkan 13, lokala tíð, har gingið verður móti amerikanska konsulátinum í Nuuk.

Sambært fyriskiparanum verður heitt á luttakarar um at hava grønlendsk fløgg og hermerki við, men at mótmælið skal vera friðarligt.

Hósdagin segði Donald Trump, at hann "metir, at tað fer eydnast" at leggja Grønland undir seg.

Við støði í hesum høvdu floksformenninir fund í dag, og ætlanin var, at flokkarnir skuldu hava felags tíðindafund eftir fundin.

Men Jón Brian Hvidtfeldt sigur úr Nuuk, at tíðindafundurin bleiv av ongum, men at flokkarnir koma við einum felags tíðindaskrivi.